പശ്ചാത്താപം (ഒരു കൊലപാതകിയുടെ)

1  

ഞാനാദ്യം വീഴ്ത്തിയ ചോരപ്പൊടിക്ക്,

നിന്റെ ചോരക്കറക്ക്..

ഇഴുകിയിരചേര്‍ന്ന കാറച്ച മണ്ണിന്..

ഗാഡ്ഢീവമുടച്ചട്ടഹസിച്ച-

യുവത്വത്തിന്..

അഗ്നി ചുട്ടെടുത്ത നീലച്ച രാവിന്..

ഉഷസ്സിനക്കരെ ആദിത്യപ്രഭാ-

മഹിമക്കേറ്റ പൊള്ളലിന്..

മാനമൊടുന്നിട്ടും

കിലുങ്ങാത്ത നിന്‍ ചിലങ്കകള്‍ക്ക്

അംഗുലിചേര്‍ക്കാതിരുന്ന വികൃതമാം

മംഗല്യ ചരടിന്..

ഉറച്ച ചങ്ങല ക്കൊളുത്തിന്

2

ജനിക്കാതെ മരിച്ച രാപ്പാടിക്ക്

നിന്റെ ജലമറ്റ ശിരസ്സിന്

തിളക്കമറ്റ മിഴികള്‍ക്ക്

കീരികളെടുക്കാതെപോയ കീരിപ്പല്ലിന്

ചിനങ്ങും മുമ്പ് ചലനമറ്റ 

ചെന്താമാരച്ചുണ്ടുകള്‍ക്ക്

നിനക്കുവേണ്ടി ജന്മമെടുത്ത 

കിളിപ്പന്തിന്, തൊട്ടാവാടിക്ക്‌..

3

ഭൂഗോളമായി കത്തിപ്പടര്‍ന്ന 

വന്യചിന്തകളുടെ അച്ചുതണ്ടിന്..

നിബിഡമാം മോഹനഭസ്സിന്റെ

രതികേന്ദ്രത്തിന്.. അതിന്റെ

ആരക്കാലു കരിഞ്ഞ

മൃഗചിന്തക്ക്..

ഒഴിഞ്ഞ മധുചഷകത്തിന്

പുകനിറച്ച കടലാസ്സുകുഴലിന്..

4

ഉണരാന്‍ വൈകിയ പ്രഭാതത്തിന്‌,

സന്ധ്യക്കും.

വിളക്കാനാവാതെ തുരുമ്പെടുത്ത

വ്രണപ്പാടുകളുടെ പൂര്‍വ്വചിത്രത്തിന് 

ചിതലരിച്ചു പൊടിഞ്ഞ മനസ്സിന്..

മാറാലകെട്ടിയ മച്ചിന്

മുന്നില്‍ കുമിഞ്ഞ വെള്ളച്ചോറിന്

പിരിഞ്ഞുതൂങ്ങിയ കയറിന്..

5

എല്ലാത്തിനുമുപരി,

എന്നെ കുറ്റവിമുക്തനാക്കുന്ന 

ആരാച്ചാര്‍ക്ക്‌...

...................................................................